Os Bondos son pezas artesás que homenaxean un xoguete doutro tempo. Cada Bondo é único. Os seus corpos, orellas, fociños e patas diferéncianos entre si e en moitas ocasións inspíranse nos habitantes caninos da Gargalleira.
Están feitos a man, con mimo e esmero. A madeira é pulida ata que o poro é imperceptible. Despois humedecémola ata seis veces para ir eliminando o repelo en sucesivas pasadas de lixa e finalmente tratámola con lasur para conservar a suavidade conseguida e protexela da humidade. Por iso, polo brillo e a tonalidade dourada do castiñeiro, anuncian un tempo de liberdade que contrasta coa existencia mineira do creador orixinal. Conservando tamén a esencia artesá e enxeñosa do vello Blackie, as partes de cada Bondo únense co mesmo sistema do orixinal: pinzas para o pelo.
AVISO IMPORTANTE
Nos estándares actuais, os BONDO non son xoguetes axeitados para crianzas pequenas, pois existe o risco de que consigan separar as pezas articuladas e/ou as pinzas. Por conseguinte, desaconsellamos o seu uso como xoguete para persoas menores de 7 anos.
Medidas
Alto 130 mm
Ancho 200 mm
Fondo 20 mm
Peso
0,2 kg (sen embalaxe)
Material principal
Castiñeiro macizo
Outros materiais
Pinzas para o pelo
Tratamento da madeira
Descortizada e pulida ata chegar a un gran 320, tras recibir seis pasadas de auga para eliminar todo o repelo e protexida con lasur incoloro á auga para protección e mantemento da cor orixinal, resaltando a veta da madeira de castiñeiro.
Cor
Madeira de castiñeiro natural. Varía segundo a consistencia, sendo máis escura nos bordes ou nas áreas onde os taninos protexeron á árbore cando vivía.
As cores da madeira poden variar nas fotografías e á vista, dependendo da luz á que se expoñan.
Co paso do tempo a madeira irá adquirindo unha pátina máis escura.
Se é situada nun lugar onde fique exposta á luz solar directa, escurecerá máis.
Consellos de instalación
Os Bondos entréganse montados e listos para xogar e decorar. As súas articulacións permiten diversas posturas, a cada unha máis riquiña.
Limpeza e mantemento
Limpar, tanto a madeira coma as pinzas, unicamente cun plumeiro ou cun pano limpo lixeiramente humedecido para retirar po ou graxa e deixar secar antes de xogar con el.
En 13Ferrados unimos tradición e creatividade para dar vida a produtos auténticos, inspirados en Galicia e elaborados con compromiso, paixón e convicción.
